“فتاة حفت حواجبها انظروا ماذا حدث لها”… !!!

وصلني ايميل من احدى العزيزات و اعتقد انه بدأ بالانتشار ان لم يكن انتشر  سأضيف ملخص للقصة ثم الرد الذي ارسلته لمن ارسلت لي القصة

تقول القصة بما معناه ان هناك فتاة قامت بحف حواجبها ثم ماتت و اثناء غسلها بدأت حواجبها تنزف دمًا حاولت المغسلة ايقاف الدم و لم تفلح ثم اتصلت باحد “المشايخ” الذي عرف بطريقة ما  ان هذه الفتاة حفت حواجبها  دون ان تذكر له المغسلة ذلك

   و الحل الذي اقترحه الشيخ  كما تقول القصة هو ان  توضع – و انتوا بكرامة -” حفاضة” على  وجه الميتة و يربط لوجهها ثم تدفن بها

انتهت القصة بعدد من الجمل من نمط هذه كانت تستهزء انظروا ماذا فعل الله بها و الخ الخ

الرد

و عليكم السلام و رحمة الله

صباح الخير يا حلو

اممممم….. ”فلانة” تصدقين هالقصة ؟

الحين لما بتكون الحرمة تغسل الميتة بتقول يالهي شو اسوي لازم اخلص وراي غيرها ؟ مااتوقع بيطلع هالكلام من وحدة تغسل ميتين و تشوف الموت كل يوم و تحترم الميتين؟ + هي تشتغل مع ميتين مو طلبات مطعم تبي تخلص وراها غيرها

الشيخ المذكور ف القصة مالقى الا حفاضة ؟ مو ممكن يحطون ضمادات مال جروح اي شي ثاني ؟

واحد بمكانة شيخ  وصاحب علم بيقول حطي حفاضة ؟  ماادري ما تدخل راسي

في شي بعد خلاني استغرب .. الميت ما يكون عليه الا الكفن على حد علمي شلون هذا يقول حطي و ربطي بعد

مااحيد يستوي يربطون شي

القصة احس فيها شي غلط  و مو قادرة اصدق انها صدق

على العموم ادري انج ماارسلتي الا عشان نيتج الطيبة و قلبج اللي يبي الخير

 ردي ما كان مثالي و ما غطى كل نقاط الضعف بالقصة .. بس هم مو حلوة من صباح الله خير ارسل للبنت اقولها “وش تبين انتي و قصتس ذي” مصدقة هالكلام انتي

احس اللي حط هالقصة من هذول اللي يبون ينصحون و نيتهم صافية و لكن ما عندهم اسلوب  او طريقة … ممكن هالقصة تنفع تقص فيها على حد بالابتدائي لكن ماتوقع غيرهم ممكن يصدق

ليش بالذات اختاروا الحفاضة و الربط ؟ من رايي الحفاضة انقصد فيها الاهانة و الذل و تقليل الشان و خصوصا ان مكانها على الوجه اللي هو رمز كرامة الانسان .. اما الربط  ف عشان يقولون تراها لاصقة  لاصقة فيك مافي فكة  (اللي هي الذلة)

هل توصلكم مثل هالقصص ؟ و ش تردون فيه عليها ؟ برايكم شو سبب هالقصص ؟ عندكم قصة مماثلة شاركونا